ຄະນະ ແລະ ຫລັກສູດ

ແນະນໍາຄະນະວິຊາ ແລະ ບັນດາຫຼັກສູດປະລິນຍາຕີ, ຕໍ່ເນື່ອງປະລິນຍາຕີ ແລະ ອະນຸປະລິນຍາ ທີ່ໄດ້ຈັດຕັ້ງການຮຽນ-ການສອນ ຢູ່ມະຫາວິທະຍາໄລແຫ່ງຊາດ ມະຫາວິທະຍາໄລແຫ່ງຊາດ (ມຊ) ສ້າງຕັ້ງຂຶ້ນຕາມດໍາລັດນາຍົກລັດຖະມົນຕີສະບັບເລກທີ 50/ນຍ, ລົງວັນທີ 09/06/1995 ແລະ ໄຂສົກຮຽນຢ່າງເປັນທາງການໃນວັນທີ 05 ພະຈິກ 1996. ມຊ ແມ່ນມະຫາວິທະຍາໄລແຫ່ງທໍາອິດຂອງ ສປປ.ລາວ ທີ່ມີຄວາມຄົບຖ້ວນສົມບູນທາງດ້ານວິຊາການມີພະນັກງານ ແລະ ອາຈານສອນທັງໝົດ 1.763 ຄົນ ຍິງ 824 ຄົນ, ປະລິນຍາເອກ 186 ຄົນ ຍິງ 42 ຄົນ, ປະລິນຍາໂທ 956 ຄົນ ຍິງ 408 ຄົນ, ສາດສະດາຈານ 5 ທ່ານ, ຍິງ 1 ທ່ານ, ຮອງສາດສະດາຈານ 87 ທ່ານ ຍິງ 13 ທ່ານ, ອາຈານ 310 ທ່ານ, ຍິງ 118 ທ່ານ, ຜູ້ຊ່ວຍອາຈານ 184 ທ່ານ, ຍີງ 98 ທ່ານ,  ມີນັກສຶກສາຮຽນໃນຫຼາກຫຼາຍສາຂາວິຊາຮຽນ ທັງໝົດ 21,613 ຄົນ ຍິງ 10,740, ໃນນັ້ນມີນັກສຶກສາຮຽນລະດັບປະລິນຍາເອກ 18 ຄົນ ຍິງ 8 ຄົນ, ນັກສຶກສາຮຽນລະດັບປະລິນຍາໂທ 1,395 ຄົນ ຍິງ 565 ຄົນ, ນັກສຶກສາຮຽນລະດັບປະລິນຍາຕີ 20,157 ຄົນ ຍິງ 9,880 ຄົນ ແລະ ນັກສຶກສາຕ່າງປະເທດ 480 ຄົນ ຍິງ 180 ຄົນ ແລະ ມຊ ຍັງໄດ້ເປັນສະມາຊິກມະຫາວິທະຍາໄລໃນເຄື່ອຂ່າຍປະເທດອາຊຽນ (AUN) ແຫ່ງດຽວໃນ ສປປ.ລາວ.

ມະຫາວິທະຍາໄລແຫ່ງຊາດ ໄດ້ກໍານົດພາລະບົດບາດຄືຕ້ອງພັດທະນາມະຫາວິທະຍາໄລໃຫ້ເປັນຜູ້ນໍາໜ້າທາງດ້ານການພັດທະນາບຸກຄະລາກອນເພື່ອຕອບສະໜອງຕາມຄວາມຕ້ອງການຂອງສັງຄົມທີ່ມີຄຸນນະພາບ, ມີຄວາມສາມາດຮອບດ້ານ, ສົ່ງເສີມວຽກງານຄົ້ນຄວ້າວິທະຍາສາດໃຫ້ກ້າວໜ້າທຽບເທົ່າກັບສາກົນ ແລະ ພາກພື້ນ,ໃຫ້ການບໍລິການທີ່ປະທັບໃຈ ແລະ ມີຄຸນນະພາບແກ່ສັງຄົມ ພ້ອມກັນນັ້ນກໍສົ່ງເສີມ ແລະ ປົກປັກຮັກສາທະນຸບໍາລຸງຮີດຄອງປະເພນີອັນດີງາມຂອງລາວເຮົາໄວ້.

ມະຫາວິທະຍາໄລແຫ່ງຊາດ ໄດ້ເຕີບໃຫຍ່ຂະຫຍາຍຂຶ້ນເປັນກ້າວໆ ຊຶ່ງໃນປັດຈຸບັນປະກອບມີ 13 ຄະນະວິຊາ ແລະ ມີຫຼັກສູດປະລິນຍາເອກ 6 ຫຼັກສູດ, ຫຼັກສູດປະລິນຍາໂທ 66 ຫຼັກສູດ, ຫຼັກສູດ​ປະລິນຍາຕີ ທີ່ໄດ້ດຳເນີນການຮຽນ-ການສອນ ທັງໝົດ 118 ຫຼັກສູດ, ໃນນັ້ນໃຊ້ເວລາຮຽນ 4 ປີ ມີ 116 ຫຼັກສູດ, ໃຊ້ເວລາຮຽນ 5 ປີມີ 1 ຫຼັກສູດ ແລະ ໃຊ້ເວລາຮຽນ 6 ປີມີ 1 ຫຼັກສູດ. ຫຼັກສູດຕໍ່ເນື່ອງປະລິນຍາຕີ ມີ 34 ຫຼັກສູດ ແລະ ຫຼັກ ສູດອະນຸປະລິນຍາ ມີຈໍານວນ 3 ຫຼັກສູດ ແລະໄດ້ຈັດຕັ້ງການ (ມີຫຼັກສູດນານາຊາດທີ່ຈັດຕັ້ງການຮຽນ-ການສອນເປັນພາສາອັງກິດ 2 ສາຂາ) ໃຊເວລາຮຽນ 5 ປີ ມີ 1 ສາຂາ, ໃຊ້ເວລາຮຽນ 6 ປີ ມີ 1 ສາຂາ, ຫຼັກສູດຕໍ່ເນື່ອງ ມີ 42 ສາຂາ ແລະ ຫຼັກສູດອະນຸປະລິນຍາ ມີ 4 ສາຂາ ລວມທັງໝົດ 236 ສາຂາ.